ودعني كريم وكال جلمات
احلى من القصايد بين إيديه
ابتسم رفرف بجنحه ويه الحمامات
وداعاً كال لا تسأل عليه
انه وياكم نبض والنبض ما مات
مادام الوطن اجمل قضية
وصاني كبل ميروح ساعات
وكال بذمتك حروف الوصيه
سلملي على الطيبين بالذات
وبوس الوالده الطيبه الوفيه
نذر هذا الجسد يفلان لو مات
منه نصوغ الف شذرة هديه
بصياغ الورد والورد والورد شتلات
طيبه من جذوره وعذب ميه
عد بيت الهلالي الكم علامات
عَلن فوك وَي نجم الثريا
ذهب وادري الذهب شَح بها الاوكات
لجن عدنه الذهب ميزة وسجيه
من كطرات دمه اخذ شذرات
وطش من المحابس واهليه
من هذا الجرح فصل سوارات
لاجمل معصم وأجمل صبيه
عريس وايزفنه الفراشات
شهم يبقى وتظل نفسه ابيه
عار اعلى الطغاة وتظل لعنات
ونجم يبقى الشهيد ويشع ضيه
جبل هذا الوطن رغم الجراحات
شواهد نور للعلم جليه
من ميسان
زهير وحيد العكيلي