أنت تدري من صعدنا
صعدت ألقسمة معانا
وألبلم شال الشراع
مرة يمشي بالبحر
ومرة يزحف على الگاع
ورغم هذا أحنا وصلنا
وألمساكين الورانا
ألحادي غرهم
أشترى بيهم وباع
باگ منهم كل تعبهم
حتى خبزات المتاع
وعلى غفلة الحادي ذبهم
طبوا بحلگ المحيط
ألف يا وسفة عليهم
حتى ما تانوا وداع
وأحنا صرنا ملح غربة
تفتت ألوحده وماع
أنت تبچی على النخلة
حتى لو كبرت وعاطت *
تيقى سعفتها شعاع
تبچي انت على البصرة
بصرتك باگوا أسمها
وزوروا حتى الحروف
صارت البصرة مشاع
ساحة يلعب بيها حاقد
لاقانون يحمي ناسه ولا ضمير
بلدة تحكمها الرعاع
حتى بغداد صارت كلها برگه
والحرامي بيها سيد
يحكم بشرع الضباع
من ترد البصرة بصرة
والعمر عندك طويل
ويرجع البغداد أسمها
الثورة والدوره وشارع
الستين والبياع
أنا وأنت نروح نمشي
واليحب يمشي معانا
نسبح بدجلة ونغني
وننسى أيام الضياع
وأنت تدري
* عندما تكبر النخله وتأخذ بالطول يسمنها عيطة
فنلندا