ليش ! أسـأل قـدرنـه اوليش محتـومْ ؟
ليش (اعـْراقـنه) كل وكتـَه مضيــُوم ؟
ليش اشعـُوب الله كـلهـه مرتـاحـَـه ؟
اوشعبنه ابكل وكِت ياناس مسگوم
لــيش انجوم تِضـوي وابسـمَـه الناس؟
واسْمـانـه مـطرهه ... يـُمـطر اسـموم
لــيش اشعوب رَبنـه اتعيش بـفراح ؟
ليش الوكت يمشي اويانه ضِــد دوم؟
وكِـتنه الصار (رَحَّـه) اويطحن ايام
وكـتهـُم بالعـــلـِم مِـزهِـر اومـَعـلوم
-----------------------------
ليش النفط عدنه ابگاعي منهوب ؟
او نفطهم وابوطنهم يزهي كل يوم
شعبهم للحكومه ابصـوتـه مسموع
حـَـچينه بالحلگ كل حقه ملجـُوم
نِــفــَسهم بالصدر مايعـرف احدود
نـِـفـَسنه ابعبرته بالريـّـــــه مكـتـوم
تِـهـلهـل ناسهم صفگه اوزغاريــد
غــَناويـنه تطگ بالأصبع اهـْـموم
ليش الأمم تبني ... اوطخت الغــيم ؟
شعـَبنه ابشـهـگِـتـه غـصـّـات بلعوم
-------------------------------
عِـدهـُم أمـْـهـُم اتــْـفاخِـر بالاولاد
بالإيـدين تصفگ عدنـَـه واتگـومْ
ـ (رأس المـال) عِـدهم صار الانسان
رخيصـه ارواحنه تـسبح بـلِـدْموم
إيـد ابـإيـد عدهـُـم .. ياهـَـنـَه الـناس
ليش الجرح عدنه ابجرحه ملچوم ؟
شـو بلـْدانهم (بـكــّـر) تِـضل لــيش ؟
بـَـغــداد العفــيفه (تـُغـْـتـَصَب) دوم
ليش ! أسـأل قـدرنـه اوليش محتـوم ؟
ليــش اعراقـــنا كل وكت مضيــُوم ؟