مدينتي التي تحملت طبول الحرب وهديرالطائرات ..كانت
تغفو على صوت المدافع والقذائف الهمجيه لبست الوشاح
الاسود سنين وسنين اتعبنا حصاد الموت للاحبه والاخوان
والاهل لم يمت الحرف والقوافي والكبرياء وكان الخزي
لآننا نكتبها بصمت.....
ألف بوسه ادز مني الى البصره
كل حرف من اسمها يولد الحسره
كل دمعة التنزل تذكر العشره
هي عشرة عمر مو يوم لو يومين
كعدنا بالشمس نتنطر الگمره
يم طلع النخل يا هو اليصل اثره
انا من الولاده وياچ ما أنساچ
ولا انساچ حتى لو خلص عمره
گضاها بالسجن ما ظل سجن يعتب
خلص هل العمر ايامه متكدره
گضاها والطفوله ابشارع المترب
والحسينيه تزهي گاعها خضره
خليني اسولف وي ابو الاسود
اغنيله ألف موال عشگ اصباي
واصرخ حيل ما ارتد
اغني حيل واتنهد
امرغث روحي بدروبه
احط عوذة علگ تذكار
بدرابينه اظل اصعد
أعدنهن اهن أشگد
اروحن منها للمربد
اشوف اهناك خضاره
ابسوگ السره اتوسد
وأتحزم مراجل ضيم
وأيام الطفوله ابروحي اتمرعد
أشوفن مالو چكليته يناديني
يگلي اخ يامسعد
للداكير أشد ارحال
احلفنا ولك اشهد
نسيت انا منو انا
هذاك انا گلب ملچوم ومسرد
لفاني البين من صغري
ولا عوفچ يبصرتنا
ولا جدمي ابد ما صد
ارد الشارع الكورنيش
مد وگيش
اسمع صوت المهيلات
وگولن سندباد البصره
ما ينساچ ملح وعيش
عشگ وبلام ودراويش
ادخل من اسد بابل
هاذي حرثة العشاگ
نهيم وياهو السايل
وي الخوره نتسامر
انتعاتب ياهو العايل
ياهو العاف ولفه وراح
ما ناشد ولا گايل
حرثتك فيض يالمعقل هجم يلفاك
بس اوداع كلها اتسولف ابطرواك
اهي سجة الريل اهناك
ويصيح المطار اتناك
والميناء عد عيناك
كلها اوداع شلون اتريدني انساك
ولا تودعني وتننوي اعله السفر
انا اكره ساعة يكون الوداع
وما اريد اتنطرك
ياشط الترك اتناك
الكزيزه وخمس ميل اتگول يا حياك
وما انسى الزبير وللاثل كشتات
اخ زبير
گلج خير...اهلچ خير
حنيه وفرح موال مثل الطير
حديثات السمر يتمايلن بالسير
ارد اردود للعشار
وادري بالگلب محتار
وبسوگ المغايز طار
مدري وين انا الگاه
ابراس الجسرأتناه
بحنا الشيخ ...بالگزاره
اركض للجزائر وبو اشعيراحا
مچوي الگلب احا
اوصل للجسر يم الفراهيدي
اهو عرسي اهو عيدي
يصرخ أيگلي اشبيدي
كل سمره تعطب نار تنهيدي
أگله گلبي ضايع راح تدري بي
وين الگاه
بعروض القوافي ونوح ترديدي
لو دمي النشف وتگطع وريدي
ابو غيلان اترجاه
تهت بين الدروب وضيعت مسره
يا شارع انس دينار گلي اشلون
ما شفت الگلب امعطب بچانون
ما مر لك گلب اعمى بلايا اعيون
يصرخ صرخة المجنون
اهو ماهو عليه ابهون
أحضنيني يبصرتنا
اريدن طلع نخلتنا
اريد اروي من اشفافچ
وأ گول اهنا ظلتنا
تراني عايش ابسدني
وحنين البصره لاحگني
بصراوي دوم تلگاني
موال الحزن اني
موال الحزن اني
شارع المترب/الحسينيه/ابو الاسود/المربد/سوگ السره/
الخضاره/داكير/الخوره/ المعقل/الكزيزه/خمس ميل/الاثل
العشار/ سوگ المغايز/حنا الشيخ/الگزاره/الجزائر/ابو شعير
محلات في البصره
مالو...بائع حلويات في باب مدرسة المربد الابتدائيه
شارع الكورنيش..شارع محاذي لشط العرب
اسد بابل / الفراهيدي/تماثيل في البصره
ابو غيلان الشاعر بدر شاكر السياب
انس دينار شارع رئيسي في البصره