شگد حلوه إنتِ .. اشكثر ..! يا عيني  يم شامه

بوجهچ  يضيع الگمر ... وگليبي  بالامه

جوريه  الشفه تعط ... اوتضوي بضوه  الخزامه

و آنه .. بهواكم طحت .. عاشگ  يعيش احلامه

والريح  تاخذني غصب ... بشراع بلّامه

أنطر جروفچ  وأغني ... والحزن  واصل الهامه

واعيش الهجر  وي الروج ... حزيّنه الروح  بنغامه

ياخذني البلم  حد الموت ... ما چالي إليشد  بحزامه

و اذوب  وگلبي وي دجله ... يا ضيم الفرات  وعثرة إجدامه

واهيم  بشهگت العاشگ ... و أذكر الهور .. بيّامه

بردي .. ول فشگ يدوّي ... او ليله انهار .. بزلامه

لمه .. و تنانير العصر دخنه ... ماي وخير .. جدامه

زهيّه الدنيه .. بيامه ... شهم .. ويعيل بيتامه

نِختْ  بغدادنه البصره ... تخَيّط الچفن .. لعدامه

بخبر .. موته .. تطشرنه !!

او بچه اعليه .. العراق .. او زاد حزنه

او بچت .. حته الطيور .. او حطت إبـ ونه

او تفرگنه !!!

يتامه .. واليتيم اينوح ... همه الستر .. والستر جنه

يلوذ .. بسدة المليوذ ... و من الحزن .. موال غنه

يا صوت .. اليهز اجبال ... نحب حته الصخر .. من خاب ظنه

و نحبنه احنه .. وبچيـنه ادموع ..يا عزة وطنه

و نحبنه احنه .. و بچينه ادموع .. يا طيبة أهلنه

   10.05.1997

    لندن