إسم الله عَـليچ .. من الحَـسَد والناس
يـل حِـسنِچ گـمر .. او ريحـتچ يـاس
أذوب بكحـلة العـين
ماخِذني الهوى وين
يا عمري و حياتي .. او خَمرة الكاس
إسم الله عَـليچ .. من الحَـسَد والنـاس
* * *
يا دنية هَـواي .. او شـوگي للملگه
يا روحي الحزينه .. او گلبي والدگه
أخاف من البُعِـد .. يحبيبه والفُـرگه
إنتِ ادواي وجروحي
يا گلبي وبَعَـد روحي
شِفتِچ من عَسل .. كل لحظه تِنباس
إسم الله عَليچ .. من الحَسَد والناس
* * *
يا نجمة حـنان .. او ليلي و اسـماي
إنتِ أجـمل خـيال .. اليمشي ويـــايّ
نَـورتي الدرب .. يا فَرحِتي او بَلواي
عزيزه أنطر مواعيدچ
يَـل ما هَـل بَعَـد عيدچ
واتغني الشفايف .. من يهِل بِـ حساس
إسم الله عَـليچ .. من الحَـسَد والناس
قيس السُهيلي
07.02.2015
لندن
عيني يبو البيت
الله يساعـدك .. عيني يبو البيت
جبتـلنه الفرح .. وياك من جيت
حلو المعشر يمحبوب
بيـك أرواحنه اتـذوب
يديم الفرح .. يا مدلول يا ريت
الله يساعدك .. عيني يبو البيت
هلا و كل الهلا .. بيك او هَلابك
دنيتـنه صفت .. ظلمه ابغـيابك
حَظنه الحلو .. الرَدَك او جابك
نفـرح بيـك يـوميّه
يل جيتك بألف جيّه
يا صبر النصبره .. ايگول مليت
الله يساعدك .. عيني يبو البيت
الله يساعـدك .. من يگبل الليل
كل طيف اليجي .. ايشَكبن الحيل
و چم مره صحت .. يا بويه يا ويل
والله انحِس البگلبك
و كل عيونه الدربك
ياما بالحلم .. شفناك مريت
وبـ جيتك حِييت .. اگلوب بالبيت
الله يساعدك .. غالي يبو البيت
قيس السهيلي
22.01.2015
لندن
عيد الحُب
ألــف بــوســه .. أطــشها بوجـهچ الضـــــاوي
تروح ابسـكته ياعـمري .. تلامس گـلبچ الهـاوي
اليفوح ابـ ريحة العنبر
شمع زاهي اورد أحمر
وبعـيد الحُـب .. لَـ سكَر وأطرب و داري
و ألف بوسـه .. أطـشها بوجهچ الضــاوي
* * *
بـعـيـد الحُـب أهديلچ .. ورد أحـــــــمر أوديـلچ
وشِعِـر یتغـزّل بحسنچ .. يدگ صفگه اویغـنيلچ
او گـلب عاشگ يناديلچ .. يظل امساهِـر ابليــلچ
يگلچ .. بــــــس تعالي
تعالي .. انطير بالعالي
ويظل الشوگ .. لَـ م اشـفـــــاف خِسـتاوي
ألـف بوســه .. أطشها بوجهچ الضاوي
* * * *
بــعـيد الحُـب .. هَـلّـت البَسمَه والحياة
بـيّـنه كـبرت .. مثل حب دجله اوفـرات
او يا محـبتي .. الباقـيه حـد الممــــــات
شما أحسب وأهوى وأعاين
أطـلع آنـــه .. فـــالـنتـــــاين
اولَجل عـينچ .. أحمِـل بهــذي البَـلاوي
ألـف بوسه .. أطـشها بوجهچ الضـاوي
قيس السهيلي
14.02.2015
لندن
قصيدة / شهيد يوم الأحد .. عصام
غداً هو يوم الشهيد يا صاحبي .. أكتب كي أهنئك بيومك المجيد
يا صاحبي وابن عمي .. الشهيدعصام حسناوي كسار
كان يوم إعتقالك , يوم عرسك الموعود , كان يوم أحد .. يعني أخذوك قبل بدء
مراسيم زواجك ,حيث كنتَ تعيش في البصرة الفيحاء , من يومها خَرِبت
الدنيا وضاع الأمان وتزعزعت الثقة بالرموز التي كنّا نعتبرها
الفياء الذي يحمينا من حرارة الصيف اللّهاب !!!! عندما
ضِعتَ ضاع الوطن
شهيد الأحـد
الدمع كل الدمع .. كَتْ من العيون
عَليك إحزِنَت .. كل حلوه يا مقدام
جريمة يوم عِرسك .. هَزت الكون
لَن كلهه لَئامه .. او قوة إجرام
يا زِيـن الشباب .. ابگبرك اتمون
تدوس اعله الشواب .. او زلم صدّام
اتآمروا شيخ وأمن .. او كل اليحقدون
عليك او عالوطن .. او باقي الأحلام
يا دنية صِبانه .. انعوفَك اشلون
يا نبع الحنان .. او حلو الأيـام
جبّـار و رعـد .. او رشّودي او سعدون
ذولَهم الرَبـع .. او زين الأنغـام
صبّـار إلتفات .. العاشوا إسجون
يعلون اعله المنايا .. او ذَني الأحكام
خَـل يسمَع قاتلك .. يا طَيب او مزيون
عصام إنتَ البطل .. مِسك الخِتام
نِـگلهم بالشرف .. بعيون اليحبون
و الروحك حبيبي .. نحتفل كل عام
و نِگلهم ... !!! و
يل مالِكم طِيب او ذِكِـر
لَـ تصدّگوا ايموت الفِكِر
ما هـيّه حـفله للــسِكِر
او لا هيّـه هوسة ناس
يا صاح كاس الحزن مو كاس
اويا چف الزنيم اشلون ينباس
او يا چـف الزنيم امنين ينباس
قيس السهيلي
13.02.2015
لندن
مثل لون الفرح
مثل لون الفرح .. روحَـك
أحبها .. اشما بَعَـد بيّه
ومثل ذاك الحزن .. روحي
بهيده .. تريد حنيّه
تعاشر غـير .. ما بيّـها
بـس إنتَ .. البعـد بيّها
ايصير إلگطعْ .. بس بيّه
روحـي تريد .. حـنـيّه
امحَلَت چَنها .. ابربيع اهـواك
عاشت صَـدّك .. او ملگاك
عـليلـه .. او تـنطـر ادواك
وهــسه .. ابعـازة الجـيّـه
روحي .. كاتلها القهـر
كلش خطيّه
بلون الفرح روحك و
أحـبها .. شـما جـرى عـلـيّه
17.02.2015
لندن