عندما لا اجد من يخرج جراحي الى النورعندما لا اجد من يغسل حبي بدمعي عندها اصرخ اني فقدتك سأبكي واتمنى ان استنشق عبير المطر وهواء الشتاء وغيوم الشتاء اطلب من الله ان يبعدني عن ذكراك وشوقي لك واحتراقي في سبيلك هذه لغة الموت الابدي ان بيزا مائل والارض منحنيه وانتي .....
الله
اشگد كبرتي
ضاعن اسنين العمر بالغربه عشتي
عشتي ايام الگحط
اخ ياليل الظلم بيه انجرحتي
الجرح خزن ابروحي
صيح يادلال بالغربه صبحتي
موگدي وعطاب روحي
چرغد اللمه وحبايب طرزتني
الدنيا .....دنيا
ادور دورة اسطوانه
بيزا اعوج هم دريتي
خلني يا بيزا اسولف
عن زلمنا الچانت اتهز الوكت
نجوم چانت اتضوي حرثات المضایف
چانت الهوسه وبيارغهم تطگ چبد السمه
كلها چانت تومي الك ها يا تجيتي
چان عثگي ورطبي برحي
اوديرمه وحنه بديتي
چان صبيان المحله العيبي بالچلاب
دره لا ليلو ابگذلتي
چان الي بالبصره بيرغ
والطويسه اشموع تضوي
كلها الي ها شو سكتي
لا تأشرين اعله بيزا
هوه ياخويه العتب چلمه وصفنتي
هوه حفنه اضلوع كاسرها الوكت
يخزر ابعينه الصلفه
يصيح ما چن انكسرتي
هوه يا خويه الدهر لچماته لچمه
الدموع امعاتت وي العين
وينه الگال عونك
منهو ايطفي جمرتي
الف غمها الروح غمه
وين ما وچت تنوح
منهو يستاهل دمعتي
ياهو اليسوه الحزن
وألمن الاسود لبستي
ياحسرتي يا حسرتي
شوف يابيزا ولك حتى الشفايف
والكحل تايه على چالي وجنتي
شوف زوگت الوكت بيدي الطيبه
ردته بس ايهوم هومه انتصرتي
چنت احطن ديرمي ومحلب عباتي
والمسچ عط بالزلف عنبر سكيتي
وشلكيتي
اشلكيتي غير صخره اتلوج بالتاريخ
والتاريخ اعوج ما يبردلي حسرتي
ولا يوگفلي دمعتي
منهو ايصد العواصف
ايصيح بيها لا تطفيلي شمعتي
منهو ايطفي اللهيب العطب
ابلحظه عشرتي
منهو منهو
وشنهو شنهو
خلها سكته
شوف يابيزا الدهر محرب علي گطع مهجتي
چنت ازف الدهر هلهوله تطگ فرحة حرثتي
وچنت احط ازواگة الزفه
اغني بصوت عالي يطش فرحتي
گلت ازامط بيك كل الناس
ما يوم انخدعتي
ضاع حچي الناس كل الناس
والديوان غلس ما دريتي
حتى شبات المضيف وگهوة الدله تبدت
كل فناجين المراجل تعتب اتگول اشكسبتي
ما كسبتي غير لوعات وهضم
علگم شربتي
يا صلافة عينچ الوكحه التخازر
هذا گله ما انخدعتي
ظلي علچي بالعلچ
خوش غنوه
انتصرتي انتصرتي
بيزا اعوج الگاع عوجه انتي عوجه
ماعدلتي ...ما عدلتي
2\1\2014
سيدني
يوم الشهيد الشيوعي
الى اولاد عمي الشهداء الاحياء...لك يا كريم خلف داخل لك
يا رعد عبد الجبار خماس للآبطال تبطل الدموع والاحزان
شهادتكم حياة وديمومه ابداً الشهاده كتاب اوراقه مفتوحه
لا تغلق ..لاتنسى سطوره انكم ليست اموات انكم ابطال .
كريم ايضم رعد وشفافه ذبلانه
يگله الموت خويه بعده ويانه
بعدنا انغني موال العشگ بصوات خجلانه
وبعدهي الگاع تصرخ حيل عطشانه
بعد كل الدروب امسدده البيبان
ومحد بالزلم ايگول هذا انا
وكل الناس تصفن دوم سهرانا
صدگ امي الحنونه اسنين حزنانه
ومحد فك حزنها وذكر اخوانه
تحلم يوم اهي بعرسي
تزفني بلهفه فرحانه
زلمنا امحزمه ابزينات
ابهور الغموگه اسباع تلگانه
نخليها الفشگ خيمات
ونخلي ارواحنا شاچور
تظل اتهلهل الدانه
بلكي تطفه نيرانه
وتدش زفة حمد النا
سرج مهره حرير
امطرز اومعروف عنوانه
اشكثر تصبر تراهي الگاع
الشهيد ايظل علم شامخ
من فيض المحبه التجري بدمانه
صدگ يا خوي ضلعي انكسر بيبانه
وصفت ذيچ السولف نوح
والغربان بركانه
زلمنا غلگت البيبان
اهناك ابعيد تتنانه
اتبدت گهوة الدله
ولا طيبه تفوح بركن ديوانه
وفراگين العشگ ضاعت
ونام الريل عل السچه
وفراگينه غفت وضاع نيشانه
وخشل اختي ابچف دلال
انباع ابرخص اثمانه
تظل اعيونها تدمع
حزينه ابهضم غرگانه
نيشان العرس ينباع
وهيه ابزود نيسانه
اختي تستحي ومتگول انا افلانه
اهو اليمته خشل اختي يظل ينباع
اختنا بالحزن والضيم
واهي هلهوله بلسانه
بعد ما صارت الزفه
ولا غبشه تدگ الباب
تطفي عطش جيرانه
هم امي بعدها اتنوح
الحنينه امعدله اشلون تعبانه
صدگ ادموع ام منذر
تنور او يوچر لهب نيرانه
وسلامه الحبيبه حلوة الحلوات
نست اتغني الحانا
غريبه الناس ما تعرف بعد معروف
واوراق الحدايق صفر ذبلانه
يا نبع الزلال الضاگ ملح الزاد
حگها الناس ميگدرون نسيانه
شرف النا نلوذ ابفي عتبته
ولهب اركانه
اعذيبي يا غصن نعناع يا نعناع
يا بيت القصيد ابطارف السانه
يا رعد او كريم اسم الشهيد ايلوگ
اولاد العمام اغماگ نهرانا
كريم اوياكريم الجود هرفي اتموت
ايزامط عل مشانق حار سجانه
انته والثريا امعلي فوگ الفوگ
وتدري بالسفينه اتريد سفانه
رعد جبار يا دره شذر الماس
برجله للشهاده ايگود دفانه
نعم نعمين هما يا عمت عيني
زلم تاج الزلم منهو اليصل شانه
هذوله اهما ذهب تيزاب ما يصدي
هم شايف ذهب ايخون خلانه
اهم انجوم وسط اگلوبنا تزهي
يا نعم الرجال او بيرغ اوطانه
*****************************