أمحلتْ...
أمحلت يا حيف ما ظلش زرع بيها
أمحلت يا حيف نشفت كل سواجيها ,
أمحلت ذيچ اللي چانت كل وكت خضرة
أمحلت ذيچ اللي چانت دومها مثمرة
أمحلت والضيم واطاها
أمحلت والليل غطاها
وچن خيم عليها الموت
فلا نجمة تشع ولا گمر يطلع
ولا حادي اليصيح ونمشي عللصوت
أمحلت , والناس ,,,چن الناس موش الناس
ذيچ اللي تشيل الراس
ذيچ التعرف المعروف
ذيچ الماتعرف الخوف
ذيچ التحضن الراية وتشد عللجرح وتگوم
لو كثرت عليها الگوم
****
أمحلت يا حيف ما ظل بيت , ما ظل بالنزل ديوان ,
بعد ما تسمع الهاون يرن , ولا ترى الفنجان
يلمع , والنزل زاهي بشبابه , والزرع ريان
يلمع , والسنابل ذهب , والنهران
ترگص , والفرح ما نگدر نلمّه
شع بعيون كل الناس , نور وبدد الظلمه ,
شع بعيون كل الناس , خير وما بعد غمَّه .
أمحلت يا حيف , ما ظل بالسلف رعيان ,
ولا ظل زارع اليزرع ,
ولا منجل يغني , ولا بعد نيسان ,
ولا مسحا التشگ الگاع وتعيد الخضار الراح ,
وتخلي مناجلنا تغني ويرگص المرواح ...
أمحلت يا حيف ,, ألف يا حيف ,,,
لا چن ما گطعنا اياس
أمحلت , والزلم بيهم زلم ,, بيهم من يشيل الراس ,
چثيره وداعت ترابچ ومايچ من زلمنا سباع ,
چثيره سباع ما تكفر لَوَن تطبگ عليها الگاع ,
تامن بالأرض والماي ,
تظل تشگ سواجي الخير واتاني الربيع الجاي .
****
هنا يلگاع , يَم الخير
يَم البَشر , يَم الزرع , يَم الماي , يَم الطير ,
جليلين الوفا عافوچ
كلو خيرچ , أوكت الضيج , راحو كلهم وخلوچ ,
ما چنهم تربَو بيچ
خافو من ظلام الليل وچلابه ,
گالو ما يروح الغيم ,
ولا ينزاح عنا الضيم ,
ولا يطلع گمر بالليل ,
ولا ينشاف نجم سهيل .
گالو ما يجينا الفجر بانواره وتباشيره ,
ولا نسمع صياح الديچ ,
ولا تغبش الحلابه ,
ولا ذاك الربيع يعود لاحبابه ,
كَالو ما يجينا الماي وتريَع العطشانه .
لاچني واخوتي وياي ,
لا چني واخوتي هواي ,
لاچنا وحگ عيناچ ما ننسى الملح والزاد ,
ولا ننگاد للعافوچ , ما ننگاد ,
ما نمشي ونعوف گبور موتانه ,
ما نرحل لوَن نشتل ثراچ ضلوع ,
لوَن نسگي ثراچ بدم ,
لوَن ليلچ يصير اظلم ,
چثير اظلم ,
لوَن كل العروگ البيچ صارن سم ,
لاچن , ما يصيرن سم .
عيب نعوفچ وننساج لو ناكل صخر وجذوع ,
عيب نعوفج وننساج لو نسگي الجهال دموع ,
عيب نعوفج وننساچ مامش مگبرة من الجوع ,
لَن عروگ بيچ طوال ,,حيل طوال ,
ما يبعد عليها الماي ,
ولا تگدر تهزها الريح لو هبت عواصف موت ,
خلي تهب عواصف نار ,
خل تهب صخر واحجار ,
خل تصفر بعالي الصوت ,
عروگچ هاي ما تيبس , عروگچ هاي
ما تيبس ولا تصفر
ولا ياثر عليها الحر
تظل تبرعم وتفرع , وهم يطلع ورد بيها
وتظل آمال كل الناس , مثلي , معلگه عليها .
****
لا ..لا وحگ كلمن طاح منهم يسبح بدمه ,
وحگ النور وسيوفه التشگ چبد الليالي السود ,
وحگ حيلي , وحگ مسحاي ,
وحگ الزاد والنعمة ,
وحگ الماي ,
وحگ السنبل المنضود ,
وحگ كلمن وگف ما عاف گاعه ولا فتر عزمه ,
وحگ الناس , كل الناس , من ترفع رواياها ,
وتنهض شادّه حزامين تطلب ثار موتاها ,
" ما ابيعك يطوگي والبشير يلوح ,
ما ابيعك والملگح على روس النخيل يلوح "
ما ابيعك لَوَن الروح مني ومن اخوتي تروح ,
وما نملك وحگ الگاع واهل الگاع غير الروح .
لابد ما يجينا الصبح وينوّر فيافينه ,
لابد ما يجينا الخير باوراده ورياحينه ,
ويروح الليل واهل الليل والخافو ظلام الليل ,
لابد ما تجي الزوده ويفيض الماي
وتريعين , وتريَّع وياچ الناس ,
وتردين مشتل للورد والياس .
همام عبد الغني المراني
بغداد - الكاظمية
آب - أيلول 1963