جرح المحب
لا أشكو من أللهيب رغم الاحتراق..حزني لا ينتهي على مرافئ الحياة عشقناك
وعشقنا لا ينتهي أنه عشق معدان أزلي لقد غيرت أقداري فكنت الحلم والواقع
والسجن والسجان لقد أثملني حبك فتهت بين الموت والجلاد والسجون ...
شگد گلتلک
يافجر تموز حنيها الگصايب
أشگد گلتلك
ناوراك الذيب
لا تامن يراونا العجايب
همه همه أشباط
لا أتصدگ عگارب
شلون تامن بالذياب
وتحسبه لمة حبايب
أشلون ننسى أحسين وعطور العبلي
شلون ننسى شبل حيدر
نافع وكل الگرايب
وي عمت عين الوكت
هاي تاليها صفت
سبحة مصايب
أشلون أنسه أدموع أمي وهي تبچي
ناطره باب السجن
عتبة خرايب
هم حسبت أحساب حوبة
كل يتيم الگال أبوي
أبليله ظلمه وعينه تربي
ما عرف شنهو السبايب
ما حسبت أحساب ناسك
كلها صاحت
لا تحط چفك بچف ميثاق خايب
لا تگول الراح الراح
المات مات
الفات فات
الشهيد أيصير غايب
شنهي وشلت
يا طراريد العرس زفة هلاهل
عرس التاريخ يا هور الغموگه
منهو ألي باع طوگه
لا سباع الفاد بيكم
لا چتل ستار بوگه
أخ يا هور الغموگه
لا الدمايه الحنت أتراب الشوارع
ما كو حوبه
خضرة مزنة أعروگه
ماتت الچلمات وي حسرات شوگه
لا يأحمد ..لا سوادي ..لا عقيل
كلها تتراكض ألحوگه
غنت أبهور الصحين
أتصيح للدنيا تعالي
خلنا نتحاسب سنين
مهرتك تسيوره جسره
سيفها أمكمل وزين
شوگها شوگ الحمام
أيغني بستات الحنين
( ستار شدة ورد ..محمد بيابي العين
فريال هودج عرس
دله أبسما أفناجين
هيهات ما غربوا
أبوجدانا باقين
جرحي عليهم جرح
أبگلبي أله نياشين
يغفى النجم بالسما
ومسافرين أسنين
ياريح لا تنكسر
أشما مشيت أتلين )
عزيز النفس يمته أتحين
بشرني ده بشرني
خلها أطگ
هلاهل دشة الطيبين
لعبنا وي ظلام ألليل ختيله
چم ليله
ألف ليله أهن أكثر
أظل أمناطر الچيله
تطگ الغبشه هلهوله
يخلگ الصوف گلي خلگك أشطوله
تعبنا وشبچة الصياد عاگوله
تعبنا وموزر الزينين مهموله
ما طب ريل لآم شامات
ولا هيل الوجاغ أبخور
حمد نايم ..حمد غافي
أخ أنكسر ماصوله
شگولن وأنا بالسبعين
حسرة حزن والگوله
ألف گوله
شگول أعليك
تظل انت الامل مابيك كل لوله
تظل أعيوني تترجاك
مو بيدي أحنن ليك
حبك بالگلب سوله
يا سيد العفى يا چبير الشان
ألك دين برگبتي
وذمتي مشكوله
تبقى انت الگمر
من يگدر أينوله