عزيز لم يمت
شمس لن تغيب ونجم لن يأفل ، لم ترحل أيها القمر السرمدي ، تبقى فكراً نيراً طوال الدهر، راسخاً ثابتاً ، يامن علمتنا الصمود والتحدي ، يامعلمنا الكبير علمتنا للحياة طعم آخر ...
ما أرثي عزيز ألموت يخسه الموت
منهو الچفنه ومنهو الحمل تابوت
ورد جوري
شموع وياس زفتنا
عرس مدلول ومدلل
خلها أتهلهل الچيلات
أحط كل چلمة للطيبين
هم سامع شمس أتموت
هم سامع رفاق وياك
طاحوا والدمع عبرات
أهل كانون ...أهل تموز
ما لاذوا .. ولا لاذوا
صدر ديوان موش أمخاتل وبسكوت
يخسه الموت
دلتنا الچبيرة أوجاغ ما يطفي
ثاريها المنايا فوت
حسافة أتموت
يا تاج الزلم وألليلو والياقوت
يا محلة الحرف منك عزيز الروح
يا أبن العراق الموت منك خاف
چم تحقيق
چم سجان
چم سلمان صاح الصوت
چم بصرة ..چم بدرة
چم جصان سجن الكوت
يخسه الموت
چم حي السكن الگبور
وچم ميت يعيش أفوت
چثيرة وداعتك حضنتهم الغبرة
چثيرة وداعتك ما خانوا العشرة
چثير وداعت الماتوا على أحبال
المشانق سكنوا النجمات
ياهو المات
گولولي
سلام عادل ..ستارخضير
صبيح سباهي ..كريم الداخل
العبلي ..حازم ..صارم
گولولي منهو المات
لا هيهات ...ألف هيهات
ندريّه الدرب عثرات
ندري الذيب والسجان
ندري الحوت
ندري الحوم والونات
چثيرة ورودنا الطيبات
چثيرة الجوري والنعناع والزينات
يا بو زياد
صار الموت مرجوحة
رجولة وزفة أحديثات
يابو سعود بديار الغرب مثواك
وأنت مأصل ومعروف
من بغداد الكريمات
متهاب المنايا العين مارفت
ولا ونت على الصعبات
انت أشراع عالي أتسابگ الروجات
ماهمك شباط البين
بقيت اتلاوي الموجات
أبن الهور لو هلهل تفگ چيلات
انت اجبال كردستان
أبن بغداد والچلعة
مناضل رافع الرايات
أبن ديرة هلي من طيب الولايات
شكتب يا عزيز سباهي شنهو أكتب
شفافي أميبسه والقلم صب مزنات
حقه القلم يبدي يذكر الزينين
رفعة راس أهلك والحزب
والناس
رفعت راس للهامات
ياهو المات
چثيرة أحياء بس أموات
چثيرة أموات بس احياء
چثيرة أتخاتل الچلمات
جثيرة وجوها أمرايات
نزف جرحي
غم البين
كل لحظه يطگ نشغات
تدريني جرف سبعين
جدم تعبان انوني الظم الحسبات
ياهو المات
شكتب ياعزيز سباهي شنهو أكتب
ياخيمة بصدر تاريخ
كلها اتهون
كلها أتموت
السهلات والصعبات
تبقى أنت رفيف الروح
أسمك بيرغ الشدات
منهو المات
28\1\2016
سيدني ....استراليا