كثير من ألاحياء أموات ، وقليل من ألاموات أحياء ، يا أصحاب الشمس وأصحاب الحرية ، شمسك لا تغيب أبداً تشع فيها أنوار الشهامة والوفاء والتضحية والحياة الحرة وخبز للجياع .
علمتنا
علمتنا يا عجيد الگوم
مامعنى الرجولة
شلون وگفات الزلم
علمتنا الموت واحد
لو بذلة
لو على درب المبادئ
ورفعة الناموس صوله
علمتنا الوطن غالي
أمنينا أعمارنا بحضنة وشليلة
هي لحظة ..هي رمشة عين
وتخضر هلاهل
هي لحظة الروح ترخصلك
وتتفجر بطولة
ما تعيش أبهضم ويله
هي گوله
هي حرثات النضال
ماهي سكتة
دوم تسعر
توصل السابع سمة
تسعر وما بيها لولة
شلون يا حب الشعب صايرلاه سولة
شلون وخيوط الفجر
الرمادي والعمارة وقلعة السلمان
تتباهه أبطولة
شلون والحلة عرس يدفك نشامة
ماتخاف الموت لو سواها جولة
وألله صار الموت مرجوحة زلمنا
مايهمها البين لو چلچل أبليلة
هي مهرة
أتصيح ياعزة أبنادم
أتصيح ياتموز وينك
وينهم أهل الحمولة
علمتنا الشمس تطلع
علمتنا الشمس لا بد ان تهلهل
ألها غبشة
عرس زفة
بس تنخة
كلها ولدك أربات أيدك
كلها أولادك تنومس من ينوله
ياجبل منهو اليگحمك
ياقمم شعبي وسهولة
من يطولة
موزرك عند السباع
كل حرف منها أبچيلة
علمتنا الموت رفع أعگال من أجل الكرامة
يامة ...يامة
يامة صاح أعگالنا احنا النشامة
ما نشف هور الصحين
ما نشف هور الغموگة
دمنا ظل أعله البواري
وبيه موزرنا علامة
صولة الانصار تشهد
بالسهول وبالجبال وبخيامة
ويامة ...يامة
يامة حنينا الوطن شوگه وغرامة
كل شهيد الطاح منه
أسأل التاريخ منهو ألشع ظلامة
زفتة فرحت عمامة
الراح منا بالسلامة
الجاي لينا
دشتة ابريم برحي
عزتة وهيبة وسامة
ما تضيع الابتسامة
خلها تتجادح تفگنا
والمنايا أتصير هامة
علمتنا الدنيه من تنضك تصيح
علمتنا أطيح كلها وما نطيح
علمتنا الدنية من تنضك تميل
علمتنا أتميل كلها ومانميل
خلة أجويريد يحصد
خل دمانا أتصير سيل
مانخاف
خلها تجفل
والنهار أيصير ليل
خل تعيل
مانميل ومانميل
لو تهب نيران تحصد
لو أشباط أيرد علينا
بيدة يستنگه الجتيل
جم قطار الموت مشوا
شيدوا قصر النهاية
ضاعت الحسبة عليهم
البداية والنهاية
وانت ذاك انت الاصيل
علمتنا
صرخة الثوار بشتاتان وبهور الصحين
علمتنا الضاع حقة
يصيح من كثر الونين
الموتة موتة
خلها موتت ثار للحق واليقين
ما نخاف الموت هلهولة عرس
احنا دوم أمعرسين
زفة الثوار كردستان وبهور الغموگة والصحين
بكل مكان أمعرسين
موش سكته بصوت عالي
الوطن صيهود يصعد
مانخاف وما نخاف
ما يهمنا اغراب ينغك
خلي يصرخ مانلين
عالي يا نجم الثريا
البيه لذنا ونستكين
شوسع گلبك
انت بو گلب الحنون
احنا منك ونت منا
ما تغيرنا السنين
علمتنا وعلمتنا
29 \3\2016
سيدني استراليا