في مأذن المساجد ، في أجراس الكنائس ، في بوث البراخة والرشامة ، تتلى التراتيل ويقام القداس وترسم أبعاد السكون وينام تحت التراب ، يقف العمر وتسقط ورقة الاحصاء ويضع النهاية حفار القبور ويغير أسمه الى شهيد ..
رحت أنا وصديقي ولمة أصحاب
لتخافين وتفكرين بيّه
أشطولة الوكت حتى النهار أنزاح
حل خيط العصر والمغربية
شموع وياس أنذر يمن أتعود
وگبل شهرين حضرت الهدية
لحظة سمعت ثغبة وصاحت الناس
تم تفجير گهوة العامرية
ماتت يمنتي واليسرى ألحوگ
بس أنا وصلت أغمه عليه
لگيتك يمه أنهر جثة بالگاع
أچذب روحي بلكل موش هيّه
عرفتك من أشفافك باست الطين
آخ الموت تاليها الردية
گعدت من بستك أبگصتك يمدلول
خضنتني ورحت أتبوس بديه
لا تبچين يمه دمعچ الماس
موش أجروح أهن نگش الشظية
أشلون أصبر وأگولن يمكن أيعود
صدگ شمعة كبرتي راح ضية
ذهب تيزاب ما تتوزن أعيار
عمت عين الشمس حتى الثريا
هو أبن العراق وأمه بغداد
ياهو الكتب مجهول الهوية
أهو أبن النهورة وأصله الداي
مندائي الاصل ملة وفية
أبوي أنا الحلالي وديني من شيت
أمي أشموع مندي القادسية
ألبس رستتي وأكليلتي أتنور
على الكابوع مندايي الضحية
ولك يمه خواتك شكن الثوب
بعد متعود ياهيهات أليّه
سنين أطوال ربيتك يمحبوب
بلحظه أتروح مني دون جيه
أنزل للگبر گبلك ولا أعود
عگب عينك منو والي عليه
بعدني أنا أشوفك لفه وگماط
من تنجح أطشن واهلية
شبعد عندي دريض رايحة وياه
وعيني ألمن بعد تبري المسيه
أبدمك حنوا التابوت يشهد
وين أبقه بعد ياهو التجيه
منهو أيگلي يمه ويطفي النار
حطني أنا أبداله بالوطية
خلوه أعله صدري ماهو أچبير
ما مفطوم أهو مثل البقيه
أمدلل والدلال أمفصل أفصال
شجاع وحيد من أهل الحمية
تركتني يا وليدي أنا والضيم
ردتك والي لي وأكعد أبفيه
تركتني وحدي بل ألام أغزل
كل جرح الاعطبة أيصير ميّه
أهو وياك الگلب والجسد ضايع
ضايع وي أخوك بالقادسية
ما أنساك حتى لو عمت العيون
أنا أمك تره ذيج التقية
عساها أبحظه وبخته السكانا الموت
عليمن تعتب وكلهم شفية
ما أقبل تره بالگبر نومك
حطني بالحد وياه سوية
ماظلي أبن واحد أبدسفول
الثاني زفتة بالعامرية
صبحت مجنونة بعدك والعقل حار
وين أسمع أغانيك الشجية
أتركني فرد لحظة يجناز
أبوسة وريحته تترس الريه
لتغمك مساحيه يحفار
صار الموت خلني البيّه بيّه
ألمن بعد أربي وأسهر ألليل
أذا كل يوم تاتينا البلية
خواتك خمسة يبني هزن الطاع
يريدنك ذخر يوم الردية
ترى ظل البواري يزعل أبساع
أشمن ريحتك صبح وعشية
أريدن أنا أزفك وأنثر الهيل
وي الهيل أحط روحي الندية
ما شيل العزه خليه منصوب
حتى أتهب عليّه المنيه
حطني بالحد يمك يمدلول
أنا أمك تراني الصابئية
1\3\2013
سيدني أستراليا