تسافر عيوني مع أسراب طيور النوارس المهاجرة ، عندما كنا في الوطن ونحن صغار أخبرتني أمي أن هذه الطيور تأتي من بلاد الواق واق ، هل يأتي يوم أهاجر معها الى العراق من دروب الواق واق ...
ما ينباع
شنو الينباع
حب الگاع
حب معدان
لا ينشرى ولا ينباع
مو بيدي ولا بيدك
هيه أطباع
من شدة اللفه وهزت الكاروك
حد كطع النفس يعراگ
لا تنشرى ولا تنباع
شنو الينباع
باصرني شبيعن
أبيع الماي
أهن نهرين بعيوني
أظل أعمى تگودوني
هضم دجلة چبير
ويهدم أمتوني
كل گطرة بألف دمعة ألف شهكة
ونين وعثرة الحرثات
العبرات تطميني
ألف حفار ألف جناز
بترابة أدفنوني
عوفوني أشم أترابة الغالي
على أفراگة يغنولي
شبيعن حيرتني الاه والونة
شبيعن باصروني أشلون
الفرات وريحة الطيبين
ماية لو شذر چلاب
مو تنشف فناجيني
شبيعن حيراني البين
خذتني روجة الصفنات
أبيع أ ترابك ألليلو
أبيع أترابك المرجان
أظل دايح على البيبان
ياباب اليلفيني
ياعتبة التدفيني
أديار الغرب چولان
يخضر صبخة بالبلان
بديار الغرب خجلان
يافشلة الفشلة من ينشدوني
أنت أمنين
من بغداد من البصرة أبن ميسان
وين أمضيع الاوطان
شنهي أمضيع العنوان
لا ماي الزلال و لا بحر يرويك
ظل عطشان
بس ماي الفرات أيشيل كل الهم
كل گطرة ترد الروح
وتخلي الجرح يلتم
آخ الهم
ماهمني الجرح والنار والنيشان
ماهمني الوكت والريح والسجان
ولا همني سفينة أتنوح
تنشد على المحبة بلهفة السفان
ماهمني لهب نيران
عمتني چلمة أنت أمنين
عمتني الغربة والعثرات
شهكات الوفي ألوان
ياريحة البصرة وحرثتك حمدان
ياريحة هلي يل ماعليها شان
ألك يعراق ألف أوجاغ
ألف أوجاغ بگليبي
لهب يسعر
تغني رنة الفنجان
تچفني وأهلهل حيل
ويرف الگلب فرحان
ثاريك الملح والزاد والاحسان
تظل انت العراق الخير والانسان
شبيعن
أبيع الريح العذيبي
دفو الماخاب ظني وماخذل شيبي
أصعد للسمة أبجنحان
أصيرن حوم
تضوي حرثة أدروبي
يحضني وأتوسد أمل حلمان
مسج بزلوف محبوبي
لهفة شوگ
أشما غيبن ..أشما أبعد
يظل دنية چبيرة أتضوي بغروبي
يظل دشة فرح ما غاب ماناسي
أظلن دوم أنا وياك ياريحة العذيبي
وتظل وآلله الحبیب وآغلاه مطلوبي