عند سقوط المطر تجتاحني رغبة صارخة الى البكاء وانا هنا في مشفى الرهاب لا اسمع سوى الحان القطرات وهي تلثم أديم الارض ضيعتني طيبتي مع الذئاب ...
تهت بدروب غربة والشراع أينود
مطر حالوب
ظلمة والمزار أبعيد
ياخذني اعله حرثة موت
صگت أغروب وبصيهود
غرگان بغدر هجرك
نيران وعلية أتزود
كلها أتصيح يامگرود
طحت بفراگ مايرحم
لا عين التغمض ليل
بس حسبات
اكعها وبوكاحة اتعود
أصبحت خوصة بمهب الريح
كل لحظة بلا صاعود
صبحت ماي وتبدة بطين
من حجيك همس ومنادس الشمات
مات العود والعواد
زرعت روحي على جرف الشوگ
ضاعت والثمن فرهود
لا مرواح لاح أبچف
ولا ثمرة تسلي الروح
لا حاصود
يافشلة الفشلة من نرد أردود
ياعيب المعاتب من يجي بسكوت
ضاع المستحة والگول ما معدود
هضيمة طيحت الغترة
من گطرة تساوة السكف وي الگاع
صبح نمرود
نرد أردود
هضم ومخازر الچلمات
لا نسمة تدگ الباب
ما مفتوح ولا مردود
شبچة بريح
شنو المصيود
تاخذني وي جاري الماي
تغطني ما اعرف الفوج
أغرگ وأتنه الروجات
كل هذا وأنا المحسود
تاليها أنا المحسود
ماي أبجود
لا تگرب ولا تشرب
هضم ومدسمل أبهدمي
حزن ومفصل بعمري
أكعة وهم يردلي أردود
أشفت منك
باصرني يخايب مو خذاني البین
يالحظة العشتها وياك متهني
يايوم السكت وني
ياويلاخ سبعيني گضت
بلان حسرة أدموع
أجيك بزود متعني
ولا چني
حسافة أسنين حبي وياك
سبع أسنين تاليها صدگ ضني
چنت حاسب جرح ويطيب
يومية أشوفنه يذكرني
بحلم وبيقظة المرعوب
أشوفنك حلم خطار
بعيوني
عيون الناس تنشدني
أگل ألهم ضوة الظلمة
ضوة مرايات
وأظل أشتاگ ملح الگاع
أظل بحرثة الصفنات
منهو الباع
وي نور الشمس ذكراك
كل مطلاع
أگول أيعود
ويرد الضوة العيني
وطرز فرحت أسنيني
أصيح الراح خلي أيروح
هلال العيد يتنيني
ياورد الشتة والصيف ماتذبل
ولا تقبل تواسینی
حرت وياك
وي الناس وي روحي
منهو ألي يداويني
منهو ألي يدگ الباب
ويخضر نياشيني
أهلهل بس ترد لي الصوت
غصب عني
أريدك ياشمس دنياي
دوم أوياي
ماريدك تصد مني
ولا ريد الهجر تذكار
على أدروب الوفة خلني
روح أبعد
روح أنسة
تلاگيني أعلى درب الشوگ
أنتظرك توافيني توافيني
20\4\2016