عاليه ....
وفيههَ ثخين ،
محمله خير وكرم ،
وعثوگها تنگط عسل ،
لا موسم الهه ولا فصل ،
طول السنة حماله ،
هنيال كلمن جاورچ ، هنياله .
كلمن وصل يمهه شبعْ
مثل النبع
للراح وللجاي يطي اميته،
بسكوت يطي اميته
من غير منَّة ولا ضجيج ولا ندم.
وسعفاتهه الخضرة ، مظله اواگفه ، صيف وشته ،
تآوي الطيور التايهه وتحميهه ،
تحميهه حر الصيف والليهوب ، من بارح يهب ،
تحميهه لو صب المطر خارور ويغرگ الگصب ،
وعشوشهه بعالي السعف ، مامونه ومغطايه .
حتى النسر من يتعب يمر بيها ،
وياخذله ساعة راحه ،
ويعيد نسل اجناحه ،
ويذوگ منهه الرطبة الريانه ،
بطيبة نفس تطيهه ،
ويرجع يحلق بالسما ،
لن (لأن ) السما ميدانه
****
ومن يتعب الفلاح ، ويحط منجله ومسحاته
يگعد بفيهه وينتچي ،
ويلگه بجذعهه مسنده ،
وقوة تنشط ساعده ،
وينسه الوكت وآهاته ،
ويمسح بچف الخير حبات العرگ من گصته ،
ويلف جگاره , ويصدح الموال والبوذية ،
وصوت السواجي والطيور تگول سمفونية
الله ....يا نخلة هلي شمحلاچ يلبرحية ،
شمحلاچ يلكلچ نفع ،
من راسچ الساسچ نفع ،
سعفچ وليفچ و الكرب ،
وعثوگچ المثل الذهب ،
تنگط عسل ،
من شگة الطليع لسلال الرطب ،
والجذع بيرغ منتصب ،
تعبت الدنيا وما تعب ،
وعروگچ المدن تثبت الگاع وتقويهه
والريح لو رادت تخرب الگاع وتعريهه
عروگچ تچلّب بيهه
وللريح ما تطيهه
****
الله....يا نخلة هلي , شمحلاچ يلبرحيه
وماحله الرجل ( الشخص ) من يشبه البرحيه ،
والأحله منّه الوالده اللي خلفت برحيه ،
والأحله منّه ام الحياة الخلفت برحيه .