وهبتك عمري بكل ممنونية ...ياتمرالبرحي ، لذت تحت خيمتك وسلكت طريقك المشرف وضاع شراعنا أيها الغالي عذراً لقد اتعبني الزمن وأتعبتنا معك ....
أشگالولك
علينا أنخون
لا والله حتى لو عمت العيون
حتى لو شهيك الروح للستار خلها نار
أنتواكح ..
ويه ملچ الموت
ولهيب الچواين ريح للطاعون
لا ...لا منخون
ولاننسه
موش أنت علينا أبهون
يمدلل ..
يبو بشت الحرير وطبت المزيون
گلي أشلون
ياحچي المعاتب شنهوالينگال
ياملگاك دشت عيد
لا عيدين
يافرگاك موت أحمر
جمر أموجرأبچانون
كلها أتهون
بس أنت تظل سالم
ياحيف الشماته الباتت من أسنيين
لا عطاب فاد أوياه
ظل مطعون
أشما أوفيلك أنذوري
وأشتل دربك أسنيني
أنا المديون
مديون الهوه الاحباب
مديون الورد بألوان
أظل مطلوب للزفة
وأظل أتنه طواري الهيل
أظل انتغ على العافوك
على اليقرون ...
رحت ابعيد ونسيت أبوجهك أعيوني
أدري الخلگ لاموني
تظل عندك نذر مرهون
أنحب والتفت صوبك
صعب أموادعك
وأتوچد أوشاله
هنياله
أشثگل فرگاك
محد گال هنياله
أريد أنساك ..أريد أنساك
أريد أرثيك
وأنه أول ضحيه أيصيح
يرثي سهم چتاله
ومحد گال هنياله
يا طعم الدفو المريوف بذياله
تدريه الحمل من طاح
صاح أيريد حماله
ونته أزيد الصگعات بچتافي
على أمتوني
وهاذي كلها أچماله
حيف الحيف جماله
ضاع الضوه من أعيوني
وضاع الضوه من أعيونك
أثغب عوفهه أبحاله
مشاحيف وتفگ عمري
طماها الوكت وأرماله
أدريك المعدل دوم ...
يانشمي وعجيد الگوم ورجاله
ماتعبت الخياله
هذوله أحنه
بخت ينزار جرح يتعشگ أخياله
الدفجات والصعبات
تصرخ تنتخي الفاله
راحت الليالي السود
شيله أمعصبه أبدگات
والچلاب يزهي بيرغ أهلاله
يبعد الروح ....يبعد العين
أنتظرك ربيع أودش على عياله
تدريه العمر صوباط
طاح السگف والناطور يبراله
أخاف أعليك ...
من هبات العذيبي
وأنته أمحمل الشكبان
هم الناس ...هم الجوع
منهو أيغيرالحاله
صريم وشوك ..غربة روح
كلنه انروح خطابه
كلنه نكعد أبجاله
أنته اشراع رحاله
أمل منك ...أمل منك
وشل عمري عله عتبة سيل
ظلت بس الانخاله
يشيل الماي غرباله
وأنه استجدي أنواله
يهنياله ....يهنياله
11\11\2016
سيدني. الارض البعيده