الغالي الدكتور صهيب لقد تيتمت قصائدي وسالت دموع القوافي وأنا أشاهد الذئاب تنهش أهلي وناسي ونجن بلا شراع وضاع علينا النوتي ...
ياصهيب ..
الزعاطيط أكبرت
صارت الدنيه كرستال وذهب
راح عطر الياس وبخور المحبه
ويّ عثرات الدغش
ويّ الذياب
ضاع كل ذاك التعب
وضاع وياه العتب
چنه أبصينيه ناكل
چان أخوهم مثل أخوي
چانت الدنيه محنه
وجوهنه حب وطرب
شنهي أگلك ...
ألف كوكز عدنه طب
صار عنوان ألليالي
گوشر وسلة رطب
صارت الدنيه كرستال وذهب
أخ ياهضمي الجبير
المالاه تاليّ ولا لاه واليّ
مالا چالي لا ولا عسگة گصب
لا يروحي يل الغشيمه
وجوه ناسچ موش همه
ماهو برحي ولا أبريم
تالي ما يصفه چسب
ألف وسفه ...
أمنين أجيبن أبو يحيى
أمنين أجيبك أبن رومي
بلكي غضبان المحبه أيرد يهب
أمنين أجيبك يبن بدوي
آخ ياعسكر الرومي
جرحي واصل للركب
جرحي خانوگ الرگب
دمعي ما بطل يصب
أمنين أجيب أهروش روحي
أتلوذ يم درفش اليهيه
وتگول عونك من تطب
أعيوني وشلة من ضواها
المضيف أمسيس بدشة غضب
گلنه أخوان ونحبهم
همه منه وأحنه منهم
تالي راونه العجب
يوم نازل يوم صاعد
يوم وسطاني الدرب
كورش ولمة دراويش الوكت
ضاع وجه المستحه
مابفه مايك عذب
ناوي أحچي ....
سكتوني ...ما حچيت
كلها صاحت أسكت انت بولهب
ياحسرتي ... ياعثرتي
هاي تاليها صفت بوه وگصب
راح كل ذاك التعب
صارت الدنيه كرستال ولعب
النجس أصبح نظيف
النظيف أصبح نجس
صار طعم الهيل علگم
صال من هب ودب
كورش أبتاجه المهيب
وكوكز أبسلة عنب
هم عگارب ما يعرفون الوفه
مايعرفون المحنه
نياتهم غدر وغلب
شنهو همه من الكتب
همه دار همه دور
إمنين همه من الغرب
همه من هرمز موش من العرب
ياصهيب يبن أختي
خلهه سكته ....
آنه فجة ضيم خرسه
فجة طرشه
أنه ناعور وحمامة
أتغني لوعات المحب
صارت الدنية كرستال او حرب
ضيعتنه المستحه
ضاع ويانه الگرب
كلها تنگد بالچعب
تريد شرجي ...أتريد غربي
بس تطب
عشنه أيام النهب
أعمارنه خلصت رعب
صرنه ريح أبلا مهب
صرنه شاخه أبلا مصب
صارت الدنيه ظلام
صارت الدنيه كرستال وچذب
صارت الدنيه كرستال وچذب

7\7\2017
سيدني استراليا