ألمن تحن
يا ما وقفنا على ضفاف شط العرب نكحل أنظارنا من وفاء النوارس الحزينة الجائعة وهي تودع السفن المتجهه الى المجهول ونحسدها لأنها ليست ممنوعة من السفر ونغني حن وآنه حن ...
حن وآنا حن
ألمن أحن ...
باعوني وآلله أبلا ثمن
ألمن أحن اليا سجن
للحلة للسلمان للتحقيق
لو حفلتي كل يوم وي زلم الامن
لوعات عثرات الزمن
ألمن أحن
الضلعي المكسور مابطل يون
للسوط للجلاد وفراش التبن
أسنين وسنين العمر
كلهن گضن ماظن يحن
ما يمتحن ولا ينمحن
ذيچ السوالف أنسن ماينطرن
مدري أبيا حرثه صفن
حتى النظر مايدري چم ليله مضن
أعدول ضيم وشكبنن
ضاع من عدنه الوسن
فرهاد صاعود النخل
بس ماصعد هام وعثر
مغشوش يل كلك دفن
ما وزرت طبة فجر
حتى الفشگ خلب طلع
أفيش لو خلب طلع
ما ينمحن ما يستحن
ألمن أحن ... ألمن أحن
ترخصلي أبسيل الدمع
أعيون وعمن
حتى السواجي فيض من دمنه رون
صارت نواعي أمدلهمه
نوح وحزن
ألمن أحن ... ألمن أحن
للطاح من عنده الرسن
والمهرة عثرت عوسجت
ما نهضت أبگاع المحن
حتى گصايبها أنثنن
ما فاد عوذه ولا سحر
بس عطبن حد الجفن
جفلن أحديثات العشگ
صفنات للمامش صفن
تدري زرازير البراري نوخن
ماتن غد ر
غنن على أصدور الفشگ
غنوة گدر ما قصرن
ماي الطلع علگم شرن
ماهلهلن ... لا بشرن وتحمرن
شنهو أثمرت شنهو أحصدن
عطشان ظليت العمر
أندب على حظي العثر
متگلي بعد أشلون أحن
المن أحن حن وآنه حن
حنيت لچفوف المهر
للبيدر اليذري الدخن
مرواح چفي مابطل
يذري حچي دمع وبچي
أعيوني بسچن بطلن
سيل الدمع حد البدن
حتى التراچي مرجحن
بس خنسه ظلن ما حچن
شگد سولفن
أسنين وسنين الحزن ما خضرن
بس الملامه والشماته والحچي ما حسبن ما حسبن
الموت كاروكه يهز
وتلولي أمه أتريد أحلامه شجن
حن وأنا أحن المن أحن
للمات سكته أبلا چفن
عطشان چاتلني العطش
جوعان شابع بس وهن
ثوبي شحيح أبلا ردن
أمد سمل آنا أبلا هدم
أصرخ وصيحن ياربع
چا وين أجن
وتريد أحن المن أحن
الروح وبآخر نفس
ويفوح هيل من الزلف
ونزف حمد لمن الحسن
أيام عمري گوطرن
راحن گضن
وسفه رحلن ما وجدن
أشگد بقن ... أشگد مشن
ياما وياما عاندن
ماحصلن ماحصلن
وتريد أحن المن أحن
سعدي جبار مكلف
1\10\2017
سيدني استراليا