آه من يلملم حنيني الان ، وانا شراع في سماء الشوق والحرية والثورة ، العصافير لا تخاف من بنادق الصياد فقد ايقنت ان الحدائق ستكون في يوماً ما قبور ....
يهي ينته ولك ياخاين العشرة
ياناسي الملح والزاد
ياناسي الك ونات بالبصرة
الك سيل ودمع وعيون ماغمضت
الومنهه اكعنهه ماترضاش
تتذكر شذى عطرة
فارگت الوسن والفرح من اسنين
ادور عذر للمامش
شنو عذرة
صفنة شيب بالسبعين
ثگل حيلي بمحطة ليل
فراگين العمر كشرة
ايام العمر خلصن على الحرثات
الك فجة چبيره انت
فجة بالعمارة وفجة بالنگرة
چا شنهو بقه ابعمرة
سبعيني غفل خلصن ابغبشة نوح
ما اتناك ...
تدرني رطب سيحان
شموخ وكبرياء وحيل
ما وچي دكل ثمرة
ظل ابرية المسلول
هوه السكران
غربة وعثرة المهرة
يبايعني بجرف عطشان
درب تعبان وبعثرة
سدى غزلك عليّ تنور
ثگبة نار
چسوة هم تفصال وعلى گدرة
بعد شلحك جزه نسيانك اضنوني
ظل تايه بلا مسرة
هضيمت عيد ...
الم ونوح والحسرة
ادور روحك بسچة
لا ريل الرحم بيهه
ولا ريل الرحم بيه
شراع التاه من بحرة
يهي ينته حلم چذاب
ناعور بسراب اغيوم
ياماي اليطب نهرة
موش انت هذاك انت
چنت امزامط العشاگ
ذهب ومطرز ابشذرة
اجفوفي تحنن بيك
اشفافك عسل دنية
كلة عرس بالگمرة
بعدت عني
لا شمعة ولا نجمة ولا ذكرة
ياكثر الالم يل غافي ابضلعي
ظل لهبة حدر كترة
غبشة ليل
عاندت البعد والشوگ
ماهمني شته وحالوب لا مطرة
اظلن على العرف انشد
عطشان ويدور الماي
عطشان على شمامك
لهبة نار ومجمرة
يتيم وخاطري مكسور
امضيع هوى السمرة
ولك غبرة
ختمتهه وياي چانون ولهب كبرة
من اسنين عفنه العمر بدروبة
مايوم الوفه نذرة
اتراب السماوة ايحني الهامات
الاوراق العتيچه مابقت حمرة
صبح شوكه اعلى صفصافة
صبخ بور ونسه گدرة
يهي انت ولك
يلمامش ابمامش
شيفيد العتب لو طاحت الغترة
وجت كل جواويني
نسوا سجن الرمادي وقاعة المحجر
نسوا قصر النهاية ودشة الطاعون
شراع ونوخ ابگيرة
شيصبرة ..
شكبر بلواه شيخبرة
طرشان الوكت غرهم سراب الليل
عثر صوتي ابملامح موت
فاحت ريحته وغدرة
شيصبرة ...شيصبرة
9/1/2019
سيدني استراليا