مشتهيتك ياوطن اكَعد بعتبة بابك
ساعه أغني..وساعه اون..ساعه أشم ترابك
هيهات ترخص ياوطن..نبقى ونظل أحبابك
ريحة المطره الخفيفه النثت وشبكَت الكَاع
وفاحت بريحة أهلنا..معنبره وتملي البقاع
طشت بروحي ودليلي آهات ساعات الوداع
ريحة ترابك وطنا..المامش الها ولا مثيل
هيه للضايع خريطه..وهي للتايه دليل
صدّك احنا ضايعين..وما نبي غيرك بديل
كَعده وي عصرية الشاي المهيّل ياوطن منوة الروح
وخبزة التنور من أيد الحبيبه تبقى بالمهجه تفوح
ومايطيب الكَلب بفراكَك أبد لاشل ولا خياط الجروح
مشتهيتك ياوطن..... أعجن ألحنه بمايك
واشعل شموع الخضر...ويسيسن بشطآنك
واندعيلك ياوطن وانذر قصايد غنن بالحانك
يمتى ياحبيّب وطنا الروح تتعنى وتجيك
وتجلي ضيم الغربه عنها وتمسح الدمعه بديك
ياوطن عيب انت تضعف..ياوطن وسفه عليك
ياوطن جنك ظفيرة حب تباهت وبشعر أسود حزين
مثل حزن الليل بيك.... ومثل دمعات الجنين
صارت الونّه على شوفك تختنك بالروح حسره ومو مثل كل الونين
يمتى يحبيّب وطنا ...الروح توفي نذورها
وتوكَف بعتبتك تنحب ..ينتفض ناطورها
سور وتسّورشواطيك....ظلوعي سورها
يمتى ياحبيّب وطنا تطك هلاهلنا بسماك
فرحه وشموع ومضايف هيل تتغنى بهواك
وتنكَضي ايام المحن..ونرد وطنا لحضنك الدافي
ونلامس وجنتك.....ونحب شفاك