غفا حب الوطن بجفوني واسترخيت
وفززتني اليوم زخات المطر وردود أنا اشتاكَيت
أهيس بالكَلب رفه تكَول عراق الك حنيت
مرهم يالوطن فيّك يداوي جروحي لو ونّيت
أخذني بعيد فيّك للنخل
للهور... للنهران
شاغت روحي يحبيّب...جمر وجيت
خذت روحي شمرتهه بديرة الينسون
ردت أغسل بكَايا الروح من ذكراك
خضّر من جديد النوب حبك..وآنه ابد مانسيت
صرت بسماك نجمة شوك..وسوالف عشك وديت
بيمن ملتهي حبيّب يابيب العين كَلي شعجب مارديت
كَالوا دمعتك تجوي الظلوع أنهار
وكَالوا كلهم أبطالك غدوا طشار
وكَالوا تسبح بدمك صغار كبار
حسافه يالوطن جا وينك أنت غفيت؟
موجانت زلم تصهل شكَرها تعود؟
مو جانت عيون الزلم جالبارود؟
مو جان الفرات ودجله بيك يزود؟
تالي يالوطن حدر النذل نخّيت؟
درفع راسك بعالي السما وزامط
وابد لاتنحني وزلامك مخايط
كل مخيط يمزك عين دوله ويحرس اهوه البيت
يناديك الكَصب والبردي ..عمر ادلال
لاتنجفي دلالك..بيد حفنه انذال
يرد اردود مايك والنخل حمّال
ويركَص هورك وينتعش لو غنيت
دسرع ياوطن داوي الجرح ويطيب
أملنا يكبر بزودك...... أبد ميخيب
ونطك بسماك هلهوله.. لون رديت