نجم ساطع من نجوم المندائيه ..نور لا ينطفي ابدا..خيمة الطيبه
والعز علمتني ان لاابكي ولا اتحدث عن المي لآن قضية شعبنا
اكبر في ذكراك يا ابو سلام القلم يتشرف بذكر العظماء...
زلم وگفت
زلم صاحت
على امتون المنايا اتگول هذا انا
يذكرها الزمن اسمائهم عل الراس
زلم شالت بيارغ زود تلگانه
ضوه ويشع بخور وهيل
اذا شح الوگت تفرشله ذرعانه
گضاها ابنگرة السلمان
والسلمان تذكر طيب ذكرانا
يا عز الرجال وصولة امحبين
ماظل سجن يعتب ما تلگانا
حله ...رمادي ..شرطة البصره
سجن الكوت بعقوبه مراجل غيض نيشانا
يا طالب بدر يا اشموع ما غابت
يا طالب بدر اذار الحانا
نعم ذكراك ذكرى ارجال
ذكرى ابطال
ما ركعت عله التربان
ولا وقعت صكوك انذال
ولا گالت ابد فد يوم تعبانا
گدها ابو سلام گدها يا اخو افلانه
امأصل يا ذهب تيزاب
يا طالب بدر ما تصدي الوانا
مو ورشن زمان اليوم
ابلحظه يهدم اغصانا
وكل يوم ايصخم ثوب خلانا
موش انته التعوف وتنحني للريح
تايه ينكر اصله وعاف ممشانا
بقيت انته المناضل يا جبل عالي
ميهمه السجن احتار سجانا
شهم والشهامه طوگ ما مثلوم
شراع الما خذل فد يوم سفانا
حسافه ابعيد بالغربه الگبر دفاك
لچن بالبصره دوم اوياك اخوانا
انته بالگلب تغفى يا هو يوصل الشانا