ايها الناصح عمدوك بالماء الجاري ، اديت بشرف وفاء الرجال ومعنى الرجولة ، وفيت لحزبك وناسك فكنت ناصحاً في حياتك ومماتك وتركت ثمرة ناصحة نا صعة خيرها عم كل الناس ...نم قرير العين يا ابا خلدون تبقى معي ما حييت ....
ادور بحرثة الغربة
أدور حرثة المامش
اذكر ذيچ ايامي
ايام الرمادي ونگرة السلمان
نبع ريحان
يبو خلدون شح الماي بالنهران
صبحت خرسه سوالفنا
صبحت للچان والماچان
سوالفنه غدة طشار
لا شذر اليشع بيها ولا تذكار
ياماجد الناصح لا تظن انساك
الك بالروح ريحة هور
حب معدان
محد عگب عينك يسأل على الصار
شجاع وماتهاب الموت
انت الموت
سلمت الامانة ابخنس بسكوت
ذوله ارجال ماهمهم شراع وريح
ولا خافوا من الجلاد والتابوت
جلادك جفل منك
صاح ابصوت
يهل وادم مو ماجد
ذهب ياقوت
يبو حظ وبخت ياشيخ يا مبخوت
ياماجد الناصح ياعلم ثوار
اتلوگ الشهادة بس لبو خلدون
ياسفر الشهادة وچيلة الاهوار
سبع وماتخاف النار
حنيت العراق بدم
جود الماي
برحي والطلع جمار
ما ضاعت مضايفكم
ولا طاحت تچية دار
اديت الوصية لحد رفيف الروح
لحد گطع النفس ويهلهل المكوار
عتابة ناي
حزن ما مر على ابنادم
مصايبنا حريچ اهواي
شحيح الماي
شحيح اتراب سجتنا
حچايانه غدة سمار
عشنا بالغرب دولاب
ماعادت سوالفنه حرز للروح
عيدية وتفرح الروح
هلهولة لعرس اذار
شمعة انت ياماجد یا ابو خلدون
شمعة وتضوي سبع اكتار
نشف ماي النهر والجرف ينحب حيف
يذكركم
كل يوم الحبل جرار
احسين الرضي ومحمد البطاط
جم ستار.. رعد جبار
بشير ازغير وبشار
نعيم ومصطفى شنيشل
حتى النجم منكم غار
انسه اكرام اگولن عايدة ياسين
لو انسه ذياب اگزار
لو انسه الرمادي وخوتك نوار
هم انسه عصام الحيد بن كسار
تعال وياي حسناوي يبن كسار
تعالوا ننصب الكلة ونزف البطل عريسنا المغوار
شباب امعرس ومهيار
صار العرس دم انهار
شوف الموت منهو اختار
يانبع الوفة يابيرغ الاحرار
باگة ياسمين وريحة الازهار
يبو خلدون يمعدل
نوگفلك ازغار اكبار
زلم اتحدت الاسوار
لا خافت من النگرة
لا الحله والعمارة
ولا درب السماوة اغبار
جروح اغماگ للستار
لا عطاب يشفيها
ولا غبشه التشع انوار
ضاع ابريمنه صار الحچي غدار
دولاب الدهر خنياب
تچية عار
اخبرك ياعزيز الروح
ضاعت كل سوالفنه
مامش بخت للاسرار
بركان ولهب اعصار
ياماجد الناصح ياعطر شبوي
خويه العين تعمه من اذكرنك
شيخ اشيوخ
سفينه ونوخذه وبحار
لويت الريح
نشمي وتسوه گولت آه
مضيف وگهوه وخطار
صامد والمنية اتلوح
البين ايلوح
تبقى سيد الثوار
ظل محتار سجانك
لو هيچي الرجال اتصير
مو سعفة ويهزها الريح
تلفي ابتالي المشوار
ماهمك برد لا گيض
ماهمك صخر وحجار
اخبرك طخت السبعين
مشلول واون قاطات
عليك انت يالحبيب
على فرحان
على لمة اهلنا وجمعة الاخيار
يا ماجد ...ياناصح
تظل اوياي اذكرنك
مادام النفس دوار
مادام النفس دوار
سعدي جبار مكلف
14/2/2019
سيدني استراليا